“गरज हि संशोधनाची जननी आहे” या त्रिकालबाधीत सत्याची प्रचीती ९० वर्षांपूर्वी “दि रेवदंडा को-ऑप अर्बन बँकची” स्थापना झाली त्यावेळीही आली. “ऋषीचे कूळ आणि नदीचे मुळ शोधू नये” असे म्हणतात. भावार्थ असा कि हे फार जिकिरीचे काम असते आणि हा अनुभव गेल्या ९० वर्षातील बँकेच्या कार्याचा आलेख शब्दबद्ध करताना पदोपदी आला. अर्थातच तो अतिशय रोचक असून “उद्योगिनी पुरुषसिंहमुपैति लक्ष्मी:” या सुभाषितास साजेसा असून “सतफलाय सतकारीता” या सुवचनाचा जणू साक्षात्कारच! “दि रेवदंडा को-ऑप अर्बन बँकेची” स्थापना दिनांक १८ ऑक्टोबर १९२८ रोजी करण्यात आली. सध्याच्या परिस्थितीला संस्थेच्या चार शाखा असून त्यातील तीन शाखा स्वमालकीच्या अद्ययावत इमारतीत कार्यांवयीत आहेत. या सर्व शाखा संगणकीकृत आहेत.